କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହ ରାଜ୍ୟସଭାରେ ୨୧ ମାର୍ଚ୍ଚ ୨୦୨୫ରେ ଦାବି କରିଥିଲେ ଯେ ୩୧ ମାର୍ଚ୍ଚ ୨୦୨୬ ସୁଦ୍ଧା ଦେଶରୁ ନକ୍ସଲବାଦ ନିର୍ମୂଳ ହୋଇଯିବ। ଏହାପରେ କେନ୍ଦ୍ରୀୟ ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ମଙ୍ଗଳବାର (୨୫ ମାର୍ଚ୍ଚ ୨୦୨୫) ଲୋକସଭାରେ କହିଥିଲେ ଯେ ୨୦୧୪-୧୫ରୁ କେନ୍ଦ୍ରୀୟ ସଶସ୍ତ୍ର ପୋଲିସ ବଳକୁ କେନ୍ଦ୍ର ସରକାରଙ୍କ ତରଫରୁ ୧୯୬.୨୩ କୋଟି ଟଙ୍କା ପ୍ରଦାନ କରାଯାଇଛି। କେନ୍ଦ୍ରର ଲକ୍ଷ୍ୟ ହେଉଛି ମାର୍ଚ୍ଚ ୨୦୨୬ ସୁଦ୍ଧା ଦେଶରୁ ନକ୍ସଲବାଦୀମାନଙ୍କୁ ନିପାତ କରିବା। ଆସନ୍ତୁ ଜାଣିବା ନକ୍ସଲବାଦୀ, ଉଗ୍ରବାଦୀ, ମାଓବାଦୀ ଓ ଆତଙ୍କବାଦୀଙ୍କ ମଧ୍ୟରେ କ’ଣ ଅନ୍ତର? ଏଭଳି ନାମକରଣ କିପରି ହେଲା ଏବଂ ଏମାନଙ୍କର ଇତିହାସ କ’ଣ?
ପଶ୍ଚିମବଙ୍ଗରେ ହୋଇଥିଲା ନକ୍ସଲବାଦର ଆରମ୍ଭ
ନକ୍ସଲୀ ବା ନକ୍ସଲବାଦୀ, ମାଓବାଦୀ, ଉଗ୍ରବାଦୀ ଓ ଆତଙ୍କବାଦୀ ମଧ୍ୟରେ ଅନ୍ତର ରହିଛି। ନକ୍ସଲବାଦ ଏକ ବିଚାରଧାରା, ଯାହା ପଶ୍ଚିମବଙ୍ଗରେ ଜମିଦାରମାନଙ୍କ ବିରୁଦ୍ଧରେ କୃଷକମାନଙ୍କ ଆନ୍ଦୋଳନ ସହ ଜଡ଼ିତ। ଏହା ୧୯୬୦ ଦଶକର କଥା। ବଙ୍ଗର ଦାର୍ଜିଲିଂ ଜିଲ୍ଲାରେ ଅବସ୍ଥିତ ନକ୍ସଲବାଡ଼ି ଗାଁରେ ଭାରତୀୟ କମ୍ୟୁନିଷ୍ଟ ପାର୍ଟିର ନେତା ଚାରୁ ମଜୁମଦାର,କାନୁ ସାନ୍ୟାଲଙ୍କ ସହ ମିଶି ସରକାର ଓ ଜମିଦାରମାନଙ୍କ ବିରୁଦ୍ଧରେ କୃଷକ ବିଦ୍ରୋହର ନେତୃତ୍ୱ ଆରମ୍ଭ କରିଥିଲେ।
ଏହି ନକ୍ସଲବାଡ଼ି ବିଦ୍ରୋହ ଯୁବକ ଓ ଗ୍ରାମୀଣ ଲୋକଙ୍କୁ ବେଶୀ ପ୍ରଭାବିତ କରିଥିଲା ଏବଂ ସମୟ ସହ ଏହା ବିହାର ଓ ଝାଡ଼ଖଣ୍ଡ ପର୍ଯ୍ୟନ୍ତ ବ୍ୟାପିଥିଲା। ପରେ ଓଡ଼ିଶା, ଆନ୍ଧ୍ରପ୍ରଦେଶ ଓ ମହାରାଷ୍ଟ୍ରରେ ମଧ୍ୟ ଲୋକମାନେ ଅତ୍ୟାଚାର ବିରୁଦ୍ଧରେ ସଶସ୍ତ୍ର ବିଦ୍ରୋହ କରିଥିଲେ। ଏହା ମାଧ୍ୟମରେ ଗରିବ ଓ ଭୂମିହୀନ କୃଷକମାନଙ୍କ ଦାବି ଉଠାଯାଇଥିଲା। ଏହି ଆନ୍ଦୋଳନକୁ ନକ୍ସଲବାଦୀ ଆନ୍ଦୋଳନ କୁହାଗଲା ଏବଂ ଏଥିରେ ସାମିଲ ଲୋକମାନେ ନକ୍ସଲୀ ନାମରେ ପରିଚିତ ହେଲେ।
ମାଓ ସେ ତୁଙ୍ଗଙ୍କ ବିଚାରଧାରାକୁ ମାନୁଥିବା ଲୋକ ମାଓବାଦୀ
ମାଓବାଦ ନାମରୁ ସ୍ପଷ୍ଟ ଯେ ଏହା ଆଧୁନିକ ଚୀନର ପ୍ରତିଷ୍ଠାତା ମାଓ ସେ ତୁଙ୍ଗଙ୍କ ବିଚାରଧାରା ସହ ଜଡ଼ିତ। ମାଓଙ୍କ ବିଚାରଧାରା ହିଂସାକୁ ସମର୍ଥନ କରେ। କ୍ଷମତା ବିରୁଦ୍ଧରେ ମାଓଙ୍କ ବିଚାରଧାରା ଅନୁସରଣ କରି ସଂଘର୍ଷରେ ଅସ୍ତ୍ରଶସ୍ତ୍ର ବ୍ୟବହାର କରୁଥିବା ଲୋକମାନେ ମାଓବାଦୀ ଭାବେ ପରିଚିତ ହେଲେ ।
ଅନେକ ସମୟରେ ଲୋକମାନେ ମାଓବାଦ ଓ ନକ୍ସଲବାଦକୁ ଏକ ମନେ କରି ଭୁଲ କରନ୍ତି। ବାସ୍ତବରେ ଏହା ଠିକ୍ ନୁହେଁ। ଯଦିଓ ଉଭୟ କମ୍ୟୁନିଷ୍ଟ ବିଚାରଧାରା ସହ ଜଡ଼ିତ, ଉଭୟର ସ୍ୱରୂପ ଅଲଗା। ଚୀନରେ ମାଓଙ୍କ ନେତୃତ୍ୱରେ ହୋଇଥିବା କ୍ରାନ୍ତିକୁ ମାଓବାଦର ଜନକ ମନାଯାଏ। ୧୯୬୨ରେ ଚୀନ ସହ ଯୁଦ୍ଧ ପରେ ଭାରତରେ ମାଓବାଦୀ ବିଚାରଧାରାକୁ ପ୍ରୋତ୍ସାହନ ମିଳିଥିଲା।
ନକ୍ସଲବାଦ ଓ ମାଓବାଦ ଉଭୟ ହିଂସା ଉପରେ ଆଧାରିତ ହୋଇଥିଲେ ମଧ୍ୟ, ସବୁଠାରୁ ବଡ଼ ଅନ୍ତର ହେଉଛି ନକ୍ସଲବାଦ ନକ୍ସଲବାଡ଼ିରେ ବିକାଶର ଅଭାବ ଓ ଗରିବୀ କାରଣରୁ ଜନ୍ମ ନେଇଥିଲା, କିନ୍ତୁ ମାଓବାଦ ଏକ ବିଦେଶୀ ରାଜନୈତିକ ବିଚାରଧାରା।
ଲକ୍ଷ୍ୟ ହାସଲ ପାଇଁ ହିଂସାର ଆଶ୍ରୟ ନେବା ହେଉଛି ଉଗ୍ରବାଦ
ଉଗ୍ରବାଦର ସିଧାସଳଖ ଅର୍ଥ ହେଉଛି ନିଜ ଲକ୍ଷ୍ୟ ହାସଲ କରିବା ପାଇଁ ଉଗ୍ରତା ଅର୍ଥାତ୍ ହିଂସାର ଆଶ୍ରୟ ନେବା। ଏହା ଏକ ବ୍ୟାପକ ଶବ୍ଦ ଏବଂ ନକ୍ସଲବାଦ, ମାଓବାଦ ଆଦି ଏହାର ଉଦାହରଣ। ଭାରତରେ ଖାଲିସ୍ତାନ ଦାବି ପାଇଁ ହୋଇଥିବା ହିଂସା ହେଉ କିମ୍ବା ପୂର୍ବୋତ୍ତରରେ ବିଭିନ୍ନ ଚରମପନ୍ଥୀ ସଂଗଠନ ଦ୍ୱାରା କରାଯାଉଥିବା ହିଂସା, ସବୁ ଉଗ୍ରବାଦ ଅଟେ। ଏଭଳି କାର୍ଯ୍ୟରେ ସାମିଲ ଲୋକମାନେ ଉଗ୍ରବାଦୀ କୁହାଯାନ୍ତି। ଉଗ୍ରବାଦ ଯେ କୌଣସି ବିଚାରଧାରାରୁ ପ୍ରେରିତ ହୋଇପାରେ। ତଥାପି, ଭାରତ ସରକାର ଆଇନ ଜାରି କରି ଉଗ୍ରବାଦୀମାନଙ୍କୁ ମଧ୍ୟ ଆତଙ୍କବାଦୀ ଘୋଷଣା କରିଛନ୍ତି।
ଆତଙ୍କିତ କରୁଥିବା ଲୋକ ଆତଙ୍କବାଦୀ
ଆତଙ୍କବାଦର ସ୍ପଷ୍ଟ ଅର୍ଥ ହେଉଛି କାହାକୁ ଆତଙ୍କିତ କରିବା ବା ଭୟଭୀତ କରିବା। ଏହା କରୁଥିବା ଲୋକମାନେ ଆତଙ୍କବାଦୀ ଭାବେ ପରିଚିତ, ଯେଉଁମାନେ ନିଜର କୌଣସି ସଠିକ୍ ବା ଅନୁଚିତ ଲକ୍ଷ୍ୟ ହାସଲ ପାଇଁ ହିଂସାର ଆଶ୍ରୟ ନିଅନ୍ତି। ଆତଙ୍କବାଦୀମାନେ କୌଣସି ଦେଶ ବା ସରକାର ବିରୁଦ୍ଧରେ ହିଂସା ଜରିଆରେ ଚାପ ସୃଷ୍ଟି କରିବାକୁ ଚେଷ୍ଟା କରନ୍ତି। ଆତଙ୍କବାଦ ଓ ଉଗ୍ରବାଦ ମଧ୍ୟରେ ଏକ ଅନ୍ତର ହେଉଛି ଯେ ଉଗ୍ରବାଦୀମାନଙ୍କୁ ସ୍ଥାନୀୟ ଲୋକଙ୍କ ସମର୍ଥନ ମିଳିଥାଏ। ଆତଙ୍କବାଦୀମାନଙ୍କ ପାଇଁ ଏହା ଜରୁରୀ ନୁହେଁ ଯେ ସେମାନେ ସ୍ଥାନୀୟ ଜନତାଙ୍କୁ ସାଙ୍ଗରେ ନିଅନ୍ତି। ଆତଙ୍କବାଦୀମାନଙ୍କୁ ଗୋଟିଏ ଦେଶ ବିରୁଦ୍ଧରେ ଅନ୍ୟ ଦେଶ ଦ୍ୱାରା ପରୋକ୍ଷ ଯୁଦ୍ଧ ପାଇଁ ମଧ୍ୟ ବ୍ୟବହାର କରାଯାଇପାରେ।
ଆତଙ୍କବାଦର ଇତିହାସ ବେଶ୍ ପୁରାତନ। ଏହି ଶବ୍ଦର ଉତ୍ପତ୍ତି ଫ୍ରାନ୍ସରେ ହୋଇଥିବା ବିପ୍ଲବ ସମୟରେ ହୋଇଥିଲା। ଆଧୁନିକ ଆତଙ୍କବାଦର ଜନ୍ମ ଅଷ୍ଟାଦଶ ଶତାବ୍ଦୀରେ ହୋଇଥିଲା ବୋଲି କୁହାଯାଏ ।
