କେନ୍ଦ୍ର ସରକାର ସାଂସଦଙ୍କ ଦରମାରେ ୨୪ ପ୍ରତିଶତ ବୃଦ୍ଧି କରିଛନ୍ତି। ସଂସଦୀୟ କାର୍ଯ୍ୟ ମନ୍ତ୍ରଣାଳୟ ଏହାର ଅଧିସୂଚନା ଜାରି କରି ଦେଇଛି। ଏହି ଦରମା ବୃଦ୍ଧି ୧ଏପ୍ରିଲ ୨୦୨୩ରୁ ଲାଗୁ ହେବ। ଅର୍ଥାତ୍ ଦୁଇ ବର୍ଷର ବକେୟା ସମସ୍ତ ସାଂସଦଙ୍କୁ ମିଳିବାକୁ ଯାଉଛି। ନୂଆ ଅଧିସୂଚନା ଅନୁସାରେ, ଏବେ ସାଂସଦଙ୍କୁ ଦରମା ରୂପେ ପ୍ରତି ମାସରେ ୧.୨୪ ଲକ୍ଷ ଟଙ୍କା ମିଳିବ। ଏପର୍ଯ୍ୟନ୍ତ ଏହା ମାସକୁ ୧ ଲକ୍ଷ ଟଙ୍କା ଥିଲା। ଯଦିଓ ଭତ୍ତା ଆଦି ମିଶାଇଲେ ଏହି ରାଶି ବହୁତ ଅଧିକ ହେବ, କିନ୍ତୁ ଅନେକ ରାଜ୍ୟରେ ବିଧାୟକଙ୍କୁ ସାଂସଦଙ୍କ ତୁଳନାରେ ଅଧିକ ଦରମା ମିଳୁଛି।
ଆସନ୍ତୁ ଜାଣିବା କେଉଁ କେଉଁଠାରେ ବିଧାୟକଙ୍କ ଦରମା ସାଂସଦଙ୍କ ଠାରୁ ଅଧିକ ଏବଂ ସେମାନଙ୍କୁ କି କି ସୁବିଧା ମିଳୁଛି?
ଦୈନିକ ଭତ୍ତା ଓ ପେନ୍ସନରେ ମଧ୍ୟ ବୃଦ୍ଧି
ପ୍ରଥମେ ଜାଣି ନିଅନ୍ତୁ ଯେ ସାଂସଦଙ୍କୁ ଦରମା ବ୍ୟତୀତ ଆଉ କି କି ଭତ୍ତା ମିଳିବ। ପ୍ରକୃତରେ, ସାଂସଦଙ୍କ ଦୈନିକ ଭତ୍ତାରେ ମଧ୍ୟ ବୃଦ୍ଧି କରାଯାଇଛି। ଦୈନିକ ଭତ୍ତା ଏବେ ୨ହଜାର ଟଙ୍କା ବଦଳରେ ୨,୫୦୦ ଟଙ୍କା ମିଳିବ। ପୂର୍ବତନ ସାଂସଦଙ୍କୁ ପ୍ରତି ମାସରେ ୩୧୦୦୦ ଟଙ୍କା ପେନ୍ସନ ମିଳିବ। ଯଦି କୌଣସି ସାଂସଦ ପାଞ୍ଚ ବର୍ଷରୁ ଅଧିକ ସମୟ ପାଇଁ ଲୋକସଭା କିମ୍ବା ରାଜ୍ୟସଭାରେ ଆଉ ଏକ କାର୍ଯ୍ୟକାଳ ସମ୍ପୂର୍ଣ୍ଣ କରିଛନ୍ତି, ତେବେ ତାଙ୍କ ପେନ୍ସନ ରାଶିରେ ୨୫୦୦ଟଙ୍କା ଅତିରିକ୍ତ ଯୋଡ଼ା ଯିବ। ଏପର୍ଯ୍ୟନ୍ତ ଏହା ୨୦୦୦ ଟଙ୍କା ଯୋଡ଼ା ଯାଉଥିଲା।
ନିର୍ବାଚନ କ୍ଷେତ୍ର ଓ କାର୍ଯ୍ୟାଳୟ ଭତ୍ତା ମଧ୍ୟ ମିଳିବ
ପ୍ରତ୍ୟେକ ସାଂସଦଙ୍କୁ ନିର୍ବାଚନ କ୍ଷେତ୍ର ଭତ୍ତା ୮୭୦୦୦ ଟଙ୍କା, କାର୍ଯ୍ୟାଳୟ ଖର୍ଚ୍ଚ ୭୫୦୦୦ ଟଙ୍କା ମିଳିବ। ସାଂସଦ ଭାବରେ କାର୍ଯ୍ୟକାଳ ସମୟରେ ଏକକାଳୀନ ୧ ଲକ୍ଷ ଟଙ୍କା ସ୍ଥାୟୀ ଆସବାବପତ୍ର ଏବଂ ୨୫୦୦୦ ଟଙ୍କା ଅସ୍ଥାୟୀ ଆସବାବପତ୍ର କିଣିବା ପାଇଁ ମିଳିବ। ଏହା ବ୍ୟତୀତ ୩୪ଟି ମାଗଣା ଫ୍ଲାଇଟ୍ ଯାତ୍ରା, ଟ୍ରେନର ପ୍ରତ୍ୟେକ ଶ୍ରେଣୀରେ ମାଗଣା ଯାତ୍ରା, ଚିକିତ୍ସା, ଟେଲିଫୋନ, ପାଣି ଓ ରାଜଧାନୀରେ ନିବାସର ସୁବିଧା ମଧ୍ୟ ମିଳିବ।
ଏଠାରେ ବିଧାୟକଙ୍କୁ ମିଳୁଛି ସର୍ବାଧିକ ଦରମା
ଦେଶରେ ବିଧାୟକଙ୍କ ସର୍ବାଧିକ ଦରମା କଥା କହିଲେ, ଏହି ମାମଲାରେ ତେଲଙ୍ଗାନା ଶୀର୍ଷରେ ଅଛି। ତେଲଙ୍ଗାନାର ବିଧାୟକଙ୍କ ଦରମା ମାତ୍ର ୨୦୦୦୦ ଟଙ୍କା ମାସିକ, କିନ୍ତୁ ଭତ୍ତା ମିଶାଇ ସେମାନଙ୍କୁ ପ୍ରତି ମାସରେ ୨.୫୦ ଲକ୍ଷ ଟଙ୍କା ମିଳୁଛି। ମଧ୍ୟପ୍ରଦେଶ ବିଧାୟକଙ୍କ ଦରମା ମାମଲାରେ ଦ୍ୱିତୀୟ ସ୍ଥାନରେ ଅଛି। ସେଠାରେ ବିଧାୟକଙ୍କୁ ଦରମା ଓ ଭତ୍ତା ନାମରେ ପ୍ରତି ମାସରେ ୨.୧୦ ଲକ୍ଷ ଟଙ୍କା ମିଳୁଛି। ଏଥିରେ ୩୦୦୦୦ ଟଙ୍କା ଦରମା, ୩୫୦୦୦ ଟଙ୍କା ନିର୍ବାଚନ କ୍ଷେତ୍ର ଭତ୍ତା, ଏହା ସହ ଚିକିତ୍ସା, କମ୍ପ୍ୟୁଟର ଅପରେଟର ଓ ଯାତ୍ରା ଭତ୍ତା ମିଶାଇ ମୋଟ ୨.୧୦ ଲକ୍ଷ ଟଙ୍କା ହୁଏ।
ବିଧାୟକଙ୍କୁ ମିଳୁଛି ଦରମା ଓ ସୁବିଧା
ସାଂସଦଙ୍କ ପରି ରାଜ୍ୟଗୁଡ଼ିକରେ ବିଧାୟକଙ୍କୁ ପ୍ରତି ମାସରେ ଦରମା ମିଳୁଛି। ପ୍ରତ୍ୟେକ ରାଜ୍ୟର ବିଧାୟକଙ୍କ ଦରମା ଭିନ୍ନ ଭିନ୍ନ। ଏହା ବ୍ୟତୀତ ସେମାନଙ୍କୁ ଭଲ ସୁବିଧା ମିଳୁଛି। ଏଥିରେ ରାଜ୍ୟର ରାଜଧାନୀରେ ନିବାସ, ଯାତ୍ରା ଭତ୍ତା, ଦୈନିକ ଭତ୍ତା, ରେଳ ଓ ରାଜ୍ୟ ସରକାରୀ ବସରେ ଯାତ୍ରାର ବିଶେଷ ସୁବିଧା ସହ ଗାଡ଼ି ଭତ୍ତା, ବ୍ୟକ୍ତିଗତ ସଚିବ ଓ ଚିକିତ୍ସା ସୁବିଧା ମଧ୍ୟ ସାମିଲ ଅଛି।
ଉତ୍ତର ପ୍ରଦେଶରେ ଏତିକି ଅଛି ବିଧାୟକଙ୍କ ଦରମା
ଉତ୍ତର ପ୍ରଦେଶରେ ବିଧାୟକଙ୍କୁ ପ୍ରତି ମାସରେ ୧.୮୭ ଲକ୍ଷ ଟଙ୍କା ମିଳୁଛି। ରାଜସ୍ଥାନରେ ପ୍ରତ୍ୟେକ ବିଧାୟକଙ୍କୁ ପ୍ରତି ମାସରେ ୧.୨୫ ଲକ୍ଷ ଟଙ୍କା ମିଳୁଛି। ଏଥିରେ ୪୦୦୦୦ ଟଙ୍କା ଦରମା ବ୍ୟତୀତ ନିର୍ବାଚନ କ୍ଷେତ୍ର ଭତ୍ତା, ଟେଲିଫୋନ ଭତ୍ତା, ଦୈନିକ ଭତ୍ତା ସାମିଲ ଅଛି। ରେଳ ଓ ସଡ଼କ ଯାତାୟାତ ସହ ଚିକିତ୍ସା ସୁବିଧା ମଧ୍ୟ ମିଳୁଛି। ଛତିଶଗଡ଼ରେ ବିଧାୟକଙ୍କ ଦରମା ମାସିକ ୨୦୦୦୦ ଟଙ୍କା। ନିର୍ବାଚନ କ୍ଷେତ୍ର ଭତ୍ତା, ଦୈନିକ ଭତ୍ତା, ଟେଲିଫୋନ ଭତ୍ତା, ଅର୍ଦ୍ଦଲି ଭତ୍ତା, ଦୈନିକ ଭତ୍ତା ଓ ଚିକିତ୍ସା ଭତ୍ତା ମିଶାଇ ଏଠାରେ ମୋଟ ୧.୧୦ ଲକ୍ଷ ଟଙ୍କା ବିଧାୟକଙ୍କୁ ମିଳୁଛି।
କର୍ଣ୍ଣାଟକ ନିକଟରେ ଦରମା ୧୦୦ ପ୍ରତିଶତ ବୃଦ୍ଧି କଲା
ନିକଟରେ କର୍ଣ୍ଣାଟକ ସରକାର ବିଧାୟକଙ୍କ ଦରମା ୧୦୦ ପ୍ରତିଶତ ବୃଦ୍ଧି କରିଛି। ସେଠାରେ ଏବେ ବିଧାୟକଙ୍କୁ ପ୍ରତି ମାସରେ ୮୦୦୦୦ ଟଙ୍କା ଦରମା ମିଳିବ। ଏହା ସହ ନିବାସ ଓ ସମ୍ପତ୍ତି ଭତ୍ତାରେ ମଧ୍ୟ ବୃଦ୍ଧି କରାଯାଇଛି। ସେହିପରି ତ୍ରିପୁରାର ବିଧାୟକଙ୍କୁ ସର୍ବନିମ୍ନ ମାସିକ ୩୪୦୦୦ ଟଙ୍କା ମିଳୁଛି।
