ଚୀନର ପ୍ରମ୍ମୁଖ ଜେନରାଲ ଗାଏବ ହେବା ପଛରେ ସି ଜିନ୍ ପିଙ୍ଗଙ୍କ ହାତ ?

ଚୀନର ସେନାର ଜଣେ ପ୍ରମ୍ମୁଖ ଜେନେରାଲ୍ ରହସ୍ୟମୟ ଭାବେ ଗାୟବ ହୋଇଯାଇଛନ୍ତି। ଏକ କାର୍ଯ୍ୟକ୍ରମରେ ଜେନେରାଲ୍ ହେ ଓ୍ଵେଇଡଙ୍ଗଙ୍କୁ ଦେଖାଯାଇ ନଥିଲା, ସେବେଠାରୁ ଏହା ମନେ କରାଯାଉଛି ଯେ ଏହି ଜେନରାଲ, ରାଷ୍ଟ୍ରପତି ଶି ଜିନପିଙ୍ଗଙ୍କ ‘ସୈନ୍ୟ ଶୁଦ୍ଧିକରଣ’ ଅଭିଯାନର ଶିକାର ହୋଇଛନ୍ତି। ପ୍ରକୃତରେ, ଚୀନର ସେନା ଗତ ୪୦ ବର୍ଷ ଧରି ବୃକ୍ଷ ରୋପଣର ଏକ କାର୍ଯ୍ୟକ୍ରମ ଆୟୋଜନ କରି ଆସୁଛି। କିନ୍ତୁ ଏଥର ଏହି କାର୍ଯ୍ୟକ୍ରମ ଅଲଗା କାରଣରୁ ଚର୍ଚ୍ଚାରେ ରହିଛି। ବୁଧବାର ରାତିରେ ଚୀନର ସରକାରୀ ଟେଲିଭିଜନରେ ଏହି କାର୍ଯ୍ୟକ୍ରମର ଭିଡିଓ ପ୍ରଦର୍ଶିତ ହୋଇଥିଲା। ପଦବୀ ଅନୁସାରେ ଏଥିରେ ଅଧିକାରୀମାନେ ଗଛ ଲଗାଉଥିଲେ। ଏହି ଆୟୋଜନରେ ଜେନେରାଲ୍ ହେ ଓ୍ଵେଇଡଙ୍ଗ ନଜର ଆସିଲେ ନାହିଁ। ସେ ପିପଲ୍ସ ଲିବରେସନ ଆର୍ମି (PLA)ରେ ଦ୍ୱିତୀୟ ସର୍ବୋଚ୍ଚ ସୈନ୍ୟ ଅଧିକାରୀ ଏବଂ ସେଣ୍ଟ୍ରାଲ ମିଲିଟାରୀ କମିଶନ (CMC)ର ଉପାଧ୍ୟକ୍ଷ ଅଟନ୍ତି।

ବସନ୍ତ ଋତୁରେ ବେଜିଂର ବାହ୍ୟ ଅଞ୍ଚଳରେ ପ୍ରତିବର୍ଷ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ। ଟିଭି କ୍ୟାମେରାରେ ସବୁ ଜେନେରାଲମାନଙ୍କୁ ଦେଖା ଯାଇଥିଲା, କିନ୍ତୁ ଜେନେରାଲ୍ ହେଙ୍କ ମୁହଁ ଗାୟବ ଥିଲା। ନ୍ୟୁଜ୍ ଏଜେନ୍ସି ମଧ୍ୟ ତାଙ୍କ ନାମର ଉଲ୍ଲେଖ କରି ନଥିଲା। ୬୭ ବର୍ଷୀୟ ଜେନେରାଲ୍ ହେ ଗତ ତିନି ସପ୍ତାହ ଧରି ସାର୍ବଜନୀନ ରୂପେ ଦେଖା ଦେଇ ନାହାନ୍ତି। ଜେନେରାଲ୍ ହେଙ୍କର ଶି ଜିନପିଙ୍ଗଙ୍କ ସହ ପୁରୁଣା ସମ୍ପର୍କ ରହିଛି। ଫୁଜିଆନ ପ୍ରଦେଶରେ ତାଙ୍କ ପ୍ରାରମ୍ଭିକ କ୍ୟାରିଅର ଦିନରୁ ହିଁ ଉଭୟଙ୍କ ମଧ୍ୟରେ ସମ୍ପର୍କ ରହିଆସିଛି। ତାଙ୍କର ଅନୁପସ୍ଥିତି ଏହି ପ୍ରଶ୍ନ ଉଠାଉଛି ଯେ ସେ କ’ଣ ଶି ଜିନପିଙ୍ଗଙ୍କ ସୈନ୍ୟ ସୁଧାର ଏବଂ ଭ୍ରଷ୍ଟାଚାର ବିରୋଧୀ ଅଭିଯାନର ଶିକାର ହୋଇଛନ୍ତି?

ଚୀନ କ’ଣ କହିଲା?

ଚୀନ ସରକାର ମଧ୍ୟ ଏ ସମ୍ପର୍କରେ କୌଣସି ସ୍ପଷ୍ଟ ବୟାନ ଦେଉ ନାହିଁ। CNN ରିପୋର୍ଟ ଅନୁସାରେ, ରକ୍ଷା ମନ୍ତ୍ରଣାଳୟର ମୁଖପାତ୍ର ଓ୍ଵୁ କିଆନ୍ ୨୭ ମାର୍ଚ୍ଚରେ କହିଥିଲେ, ‘ଏହି ମାମଲା ସମ୍ପର୍କରେ ଆମ ପାଖରେ କୌଣସି ସୂଚନା ନାହିଁ।’ ବିଶେଷଜ୍ଞମାନେ ମତ ଦେଇଛନ୍ତି ଯେ ଏଭଳି ଆୟୋଜନରେ ସମସ୍ତ ବଡ଼ ନେତାଙ୍କ ଉପସ୍ଥିତି କମ୍ୟୁନିଷ୍ଟ ପାର୍ଟିର ଏକତା ଦେଖାଇବା ପାଇଁ ଜରୁରୀ। ଯଦିଓ କେତେକ ମାନନ୍ତି ଯେ ଜେନେରାଲ୍ ହେ ତାଇୱାନ ଉପକୂଳରେ ନିକଟ ପାଖରେ ହୋଇଥିବା ସୈନ୍ୟ ଅଭ୍ୟାସର ପ୍ରସ୍ତୁତିରେ ବ୍ୟସ୍ତ ଥାଇପାରନ୍ତି। କିନ୍ତୁ ତାଙ୍କର ଅନୁପସ୍ଥିତି ସାଧାରଣ ନୁହେଁ।

ଆପଣା ଲୋକଙ୍କ ଉପରେ ମଧ୍ୟ ଜିନପିଙ୍ଗଙ୍କର ଭରସା ନାହିଁ

ଶି ଜିନପିଙ୍ଗ କ୍ଷମତାକୁ ଆସିବା ପରେ ସେନାରେ ନିଜର ବିରୋଧୀମାନଙ୍କୁ ହଟାଇ ବିଶ୍ୱସ୍ତ ଲୋକଙ୍କୁ ଉଚ୍ଚ ପଦବୀରେ ବସାଇଛନ୍ତି। କିନ୍ତୁ ଏବେ ତାଙ୍କ ଦ୍ୱାରା ମନୋନୀତ ଲୋକମାନେ ହିଁ ସନ୍ଦେହର ଘେର ଭିତରେ ଅଛନ୍ତି। ଗତ କିଛି ବର୍ଷ ମଧ୍ୟରେ ଶି ସେନାର ଅନେକ ବଡ଼ ଅଧିକାରୀଙ୍କୁ ହଟାଇଛନ୍ତି, ଯେଉଁଥିରେ ଦୁଇଜଣ ରକ୍ଷା ମନ୍ତ୍ରୀ ମଧ୍ୟ ସାମିଲ ଅଛନ୍ତି। ୨୦୨୩ ଗ୍ରୀଷ୍ମ ପରେ ଚୀନର ରକ୍ଷା ପ୍ରତିଷ୍ଠାନରୁ ଏକ ଡଜନରୁ ଅଧିକ ଉଚ୍ଚ ପଦବୀ ଅଧିକାରୀଙ୍କୁ ହଟାଯାଇଛି। ଜେନେରାଲ୍ ହେଙ୍କ ଅନୁପସ୍ଥିତି ଏହି ପ୍ରଶ୍ନ ଉଠାଉଛି ଯେ ଶି ଜିନପିଙ୍ଗଙ୍କୁ ନିଜ ନେତୃତ୍ୱ ଉପରେ ଭରସା କମ୍ ହେଉଛି କି?