ବିଶ୍ୱରେ ସବୁଠାରୁ ଶକ୍ତିଶାଳୀ ଦେଶ ଆମେରିକା ନିକଟରେ ଭାରତୀୟ ପ୍ରବାସୀମାନଙ୍କୁ ହାତରେ ହାତକଡ଼ି ପିନ୍ଧାଇ ସାମରିକ ଜାହାଜରେ ଭାରତକୁ ପଠାଇଥିଲା। ଏବେ ଆମେରିକା ଭାରତକୁ ଧାର୍ମିକ ସ୍ୱାଧୀନତା ଉପରେ ଜ୍ଞାନ ଦେଇଛି। ଆମେରିକୀୟ କଂଗ୍ରେସ ଆୟୋଗ ମଙ୍ଗଳବାର ଦିନ ଅନ୍ତର୍ଜାତୀୟ ଧାର୍ମିକ ସ୍ୱାଧୀନତା ବିଷୟରେ ଟିପ୍ପଣୀ କରି କହିଛି ଯେ ଭାରତରେ ଅଳ୍ପସଂଖ୍ୟକଙ୍କ ସହିତ ଖରାପ ବ୍ୟବହାର ହେଉଛି। କେବଳ ଏତିକି ନୁହେଁ, ଆମେରିକୀୟ ଆୟୋଗ ଭାରତର ଶକ୍ତିଶାଳୀ ଗୁଇନ୍ଦା ଏଜେନ୍ସି ର (RAW) ଉପରେ ମଧ୍ୟ ପ୍ରତିବନ୍ଧକ ଲଗାଇବା କଥା କହିଛି। ଏଥିପାଇଁ ଏହା ର ବିରୋଦରେ ଅମୂଳକ ଅଭିଯୋଗ ଲଗାଇ କହିଛି ଯେ ଶିଖ ବିଚ୍ଛିନ୍ନତାବାଦୀଙ୍କ ତଥାକଥିତ ହତ୍ୟାରେ ଭାରତୀୟ ଏଜେନ୍ସିର ହାତ ରହିଛି। ଆମେରିକା ଦ୍ୱାରା ର ଉପରେ ପ୍ରତିବନ୍ଧକ ଲଗାଇବା ନେଇ ଚାଲିଥିବା ବିତର୍କ ମଧ୍ୟରେ ଆସନ୍ତୁ ଜାଣିବା ଯେ ପ୍ରକୃତରେ ଆମେରିକା ଏହା କରିପାରିବ କି?
ର’କୁ କ’ଣ ଆମେରିକା ପ୍ରତିବନ୍ଧକ ଲଗାଇପାରିବ?
ଆମେରିକୀୟ ଆୟୋଗ ଭାରତର ଗୁଇନ୍ଦା ଏଜେନ୍ସି ରିସର୍ଚ୍ଚ ଆଣ୍ଡ ଆନାଲିସିସ ୱିଙ୍ଗ ବା ର(RAW) ବିରୋଧରେ ପ୍ରତିବନ୍ଧକ ଲଗାଇବାକୁ ସୁପାରିଶ କରିଛି। ଅନ୍ୟପକ୍ଷରେ ରଏଟର୍ସ ତା’ର ରିପୋର୍ଟରେ କହିଛି ଯେ ଆମେରିକୀୟ ସରକାର ଭାରତର ଗୁଇନ୍ଦା ଏଜେନ୍ସି ର ଉପରେ ପ୍ରତିବନ୍ଧକ ଲଗାଇବାର ସମ୍ଭାବନା ବହୁତ କମ୍, କାରଣ ପ୍ୟାନେଲ ଦ୍ୱାରା କରାଯାଇଥିବା ସୁପାରିଶଗୁଡ଼ିକ ବାଧ୍ୟତାମୂଳକ ନୁହେଁ। ତେଣୁ ଆମେରିକା ର ଉପରେ ପ୍ରତିବନ୍ଧକ ଲଗୁ କରିବା ସମ୍ଭାବନା କମ୍ ରହିଛି।
ର କେତେ ଶକ୍ତିଶାଳୀ?
ର ହେଉଛି ଭାରତର ପ୍ରମୁଖ ଗୁଇନ୍ଦା ଏଜେନ୍ସି। ଏହାର ଗଠନ ରାମେଶ୍ୱର ନାଥ କାଓଙ୍କ ମାର୍ଗଦର୍ଶନରେ କରାଯାଇଥିଲା। ର’ର ନେତୃତ୍ୱ ଜଣେ ନିର୍ଦ୍ଦେଶକ ନେଇଥାନତି, ଯାହାଙ୍କ ନିଯୁକ୍ତି କେନ୍ଦ୍ର ସରକାରର କାର୍ମିକ ମନ୍ତ୍ରଣାଳୟ ଦ୍ୱାରା ହୋଇଥାଏ। ଏହାର ନିର୍ଦ୍ଦେଶକ ସିଧାସଳଖ ପ୍ରଧାନମନ୍ତ୍ରୀଙ୍କୁ ରିପୋର୍ଟ କରନ୍ତି। ଏହି ଏଜେନ୍ସିରେ ଭାରତୀୟ ସେନା, ପୋଲିସ ଏବଂ ଅନ୍ୟାନ୍ୟ ସିଭିଲ ସେବା ସମେତ ଭାରତ ସରକାରର ଅନେକ ଶାଖାର ଅଧିକାରୀ କାର୍ଯ୍ୟ କରନ୍ତି। ଏହି ଏଜେନ୍ସି ବିଶ୍ୱର ସବୁଠାରୁ ପ୍ରସିଦ୍ଧ ଗୁଇନ୍ଦା ଏଜେନ୍ସିଗୁଡ଼ିକ ମଧ୍ୟରେ ସାମିଲ ଅଟେ।
ର’ର ପ୍ରମୁଖ ଅପରେସନ୍ସ
ର’କୁ ଅପରେସନ୍ ସ୍ମାଇଲିଙ୍ଗ ବୁଦ୍ଧ, ଯାହା ଭାରତର ନ୍ୟୁକ୍ଲିୟର ପ୍ରୋଗ୍ରାମ ଥିଲା, ତାହାକୁ ଗୋପନ ରଖିବାର ଦାୟିତ୍ୱ ଦିଆଯାଇଥିଲା। ର ଯୋଗୁଁ ପାକିସ୍ତାନ, ଆମେରିକା ଏବଂ ଚୀନ୍କୁ ଏହାର ପରୀକ୍ଷଣ ପୂର୍ବରୁ କିଛି ଆଭାସ ମିଳି ନଥିଲା। ୮୦ ଦଶକରେ ଖାଲିସ୍ତାନୀ ଚରମପନ୍ଥୀଙ୍କ ସହିତ ମୁକାବିଲା, ସ୍ନାଚ୍ ଅପରେସନ୍ସ, ରଙ୍ଗଭେଦ ବିରୋଧୀ ଆନ୍ଦୋଳନ, ଅପରେସନ୍ ଲିଚ୍, ଅପରେସନ୍ କାକ୍ଟସ୍, ଅପରେସନ୍ ଚାଣକ୍ୟ, ଅପରେସନ୍ ମେଘଦୂତ, ଅପରେସନ୍ କାହୁଟା ଭଳି ବଡ଼ ବଡ଼ କାର୍ଯ୍ୟକୁ ସମ୍ପାଦନ କରିଛି।
