ଆଜି ମହିଳାମାନେ କୌଣସି କ୍ଷେତ୍ରରେ ପଛରେ ନାହାନ୍ତି। ଇ-ରିକ୍ସା ଚଳାଇବାଠାରୁ ଆରମ୍ଭ କରି ଲଢ଼ୁଆ ବିମାନ ଉଡ଼ାଇବା ପର୍ଯ୍ୟନ୍ତ ସେମାନେ ପୁରୁଷଙ୍କୁ ପଛରେ ପକାଇ ନିଜକୁ ସାବ୍ୟସ୍ତ କରୁଛନ୍ତି । ପ୍ରଶାସନଠାରୁ ଆରମ୍ଭ କରି କ୍ଷମତାର କରିଡର ପର୍ଯ୍ୟନ୍ତ ସେମାନଙ୍କ ପ୍ରଭାବ କ୍ରମାଗତ ଭାବେ ବୃଦ୍ଧି ପାଉଛି। ଏଭଳି ପରିସ୍ଥିତିରେ ମହିଳା ଅପରାଧ ଦୁନିଆରେ କିପରି ପଛରେ ରହିପାରିବେ? ଆସନ୍ତୁ ଜାଣିବା ଏଭଳି ୧୦ ଜଣ ଲେଡି ଡନ୍ ଙ୍କ କାହାଣୀ, ଯାହାଙ୍କ ନାମ ଶୁଣିଲେ ଭୟରେ ଥରନ୍ତି ସାଧାରଣ ଲୋକଙ୍କଠାରୁ କୋଟିପତି ଓ ନେତା ।
ସନ୍ତୋକବେନ୍ ସାରାଭାଇ ଜାଡେଜା:
ଗୁଜରାଟର ସନ୍ତୋକବେନ୍ ସାରାଭାଇ ଜାଡେଜାଙ୍କୁ ଗଡ୍ ମଦର ବୋଲି ମଧ୍ୟ କୁହାଯାଏ। ୧୯୮୦ ଦଶକରେ ପୋରବନ୍ଦରର ଗୋଟିଏ ମିଲ୍ ର ମାଲିକ ନିଜ କାରଖାନାରେ ଧର୍ମଘଟ ବନ୍ଦ କରିବାକୁ ଜଣେ ସ୍ଥାନୀୟ ଅପରାଧୀର ସହାୟତା ନେଇଥିଲେ । ତେବେ ଅପରାଧୀ ଜଣକ ମିଲରେ ପହଂଚିବା ପରେ ତାକୁ ହତ୍ୟା କରାଯାଇଥିଲା । ହତ୍ୟାକାରୀର ନାମ ଥିଲା ସରମନ ମୁଞ୍ଜା ଜାଡେଜା । ଜାଡେଜା ସେହି ମିଲର ଜଣେ ଶ୍ରମିକ ଥିଲା । ଜାଡେଜା ସେହି ସ୍ଥାନୀୟ ଡନକୁ ହତ୍ୟା କରିବା ପରେ ତା’ ସାମ୍ରାଜ୍ୟକୁ ହଡ଼ପ କରିଥିଲା । ୧୯୮୬ରେ ଯେତେବେଳେ ସରମନଙ୍କୁ ହତ୍ୟା କରାଗଲା, ସେତେବେଳେ ପତ୍ନୀ ସାଣ୍ଟୋକବେନ୍ ଗ୍ୟାଙ୍ଗର ମଙ୍ଗ ଧରିଥିଲା । ସ୍ୱାମୀଙ୍କ ହତ୍ୟାର ପ୍ରତିଶୋଧ ନେବା ପାଇଁ ପୋରବନ୍ଦରରେ ସେ ୧୪ ଜଣଙ୍କୁ ହତ୍ୟା କରିଥିଲେ। ସନ୍ତୋକବେନର ଗ୍ୟାଙ୍ଗରେ ଶହେରୁ ଅଧିକ ଲୋକ ଥିଲେ। ସନ୍ତୋକବେନ ବିରୋଧରେ ୫୦୦ରୁ ଅଧିକ ମାମଲା ରୁଜୁ ହୋଇଥିଲା। ପରବର୍ତ୍ତୀ ସମୟରେ ତାଙ୍କ ଉପରେ ଗଡ୍ ମାଦର ନାମରେ ଏକ ଫିଲ୍ମ ମଧ୍ୟ ନିର୍ମାଣ କରାଯାଇଥିଲା।
ଅଭିନେତ୍ରୀ ଅପହରଣ ରାଣୀ
ମଧ୍ୟପ୍ରଦେଶର ଉଜ୍ଜୈନରେ ଜନ୍ମିତ ଅର୍ଚ୍ଚନା ବାଲମୁକୁନ୍ଦ ଶର୍ମା ମଧ୍ୟ ଏକଦା ଆତଙ୍କର ଅନ୍ୟନାମ ଥିଲା । ଚାରି ଭାଇଭଉଣୀଙ୍କ ମଧ୍ୟରେ ବଡ଼ ଅର୍ଚ୍ଚନା କେନ୍ଦ୍ରୀୟ ବିଦ୍ୟାଳୟରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଥିଲେ। ଏହାପରେ ସେ ପୁଲିସରେ ଚୟନ ହୋଇ ୬ ମାସ କାମ କରିଥିଲେ। ଏହା ଭିତରେ ହିରୋଇନ ହେବା ଭୂତା ଅର୍ଚ୍ଚନା ମୁଣ୍ଡରେ ସବାର ହୋଇଥିଲା । ଡନ୍ ବବଲୁ ଶ୍ରୀବାସ୍ତବ ଜରିଆରେ ଅର୍ଚ୍ଚନା ଅଭିନେତ୍ରୀ ହୋଇପାରିନଥିଲେ ମଧ୍ୟ ସେ ଜଣେ ଦୁର୍ଦ୍ଦାନ୍ତ ଅପରାଧୀ ଭାବେ କୁଖ୍ୟାତ ହୋଇଥିଲା । ସମୟକ୍ରମେ ସେ ଅପରାଧ ଦୁନିଆରେ ଅପହରଣ ରାଣୀ ଭାବେ ପରିଚିତ ହୋଇଥିଲା । ଅର୍ଚ୍ଚନାର ମୁଖ୍ୟ କାମ ଥିଲା ଟଙ୍କା ପାଇଁ ଅପହରଣ ।
ଫୁଲନ ଦେବୀ: ୨୨ ଠାକୁରଙ୍କୁ ହତ୍ୟା
୧୯୮୦ ଦଶକରେ ଫୁଲନ ଦେବୀ ଉତ୍ତରପ୍ରଦେଶରୁ ମଧ୍ୟପ୍ରଦେଶ ପର୍ଯ୍ୟନ୍ତ ଚମ୍ବଲର ଆତଙ୍କର ଅନ୍ୟ ଏକ ନାମ ଥିଲେ । ୧୯୬୩ମସିହାରେ ୟୁପିର ଜାଲୌନ ଜିଲ୍ଲାରେ ଜନ୍ମଗ୍ରହଣ କରିଥିବା ଫୁଲନଙ୍କୁ କିଶୋର ଅବସ୍ଥାରେ ନିର୍ଯାତନାର ସମ୍ମୁଖୀନ ହେବାକୁ ପଡ଼ିଥିଲା। ମାତ୍ର ୧୬ ବର୍ଷ ବୟସରେ ଡକାୟତମାନେ ତାଙ୍କୁ ଅପହରଣ କରି ନେଇଥିଲେ, ଯେଉଁକାରଣରୁ ସେ ନିଜେ ଡକାୟତ ହେବା ରାସ୍ତାରେ ବାହାରିଥିଲେ ଏବଂ ୧୪ ଫେବୃଆରୀ ୧୯୮୧ରେ ବେହମାଇ ଗ୍ରାମରେ ୨୨ ଜଣ ଠାକୁରଙ୍କୁ ହତ୍ୟା କରି ସେ କୁଖ୍ୟାତ ହୋଇଥିଲେ ।
ଠାକୁରମାନେ ତାଙ୍କୁ ଗଣଦୁଷ୍କର୍ମ କରିଥିଲେ । ପ୍ରତିଶୋଧରେ ସେ ବେହମାଇ ଗାଁରେ ୨୨ ଜଣ ଠାକୁରଙ୍କୁ ହତ୍ୟା କରିଥିଲେ । ୧୯୮୩ମସିହାରେ ତାଙ୍କୁ ୟୁପିର ଜେଲକୁ ପଠାଯିବ ନାହିଁ ବୋଲି ସର୍ତ୍ତ ରଖି ଆତ୍ମସମର୍ପଣ କରିଥିଲେ। ୧୯୯୪ରେ ଜେଲରୁ ମୁକୁଳିବା ପରେ ଫୁଲନ ଏସପି ଟିକେଟରେ ସାଂସଦ ହୋଇଥିଲେ । ପରେ ଫୁଲନଙ୍କୁ ମଧ୍ୟ ଗୁଳି କରି ହତ୍ୟା କରାଯାଇଥିଲା।
ହସିନା ପାର୍କର: ନାଗପଡ଼ାର ଗଡ୍ ମଦର
ଭାରତର ମୋଷ୍ଟ ୱାଣ୍ଟେଡ ଅପରାଧୀ ତଥା ଆତଙ୍କବାଦୀ ଦାଉଦ ଇବ୍ରାହିମଙ୍କ ଭଉଣୀ ହସିନା ପାର୍କରଙ୍କ ନାମ କିଏ ନ ଜାଣିବ? କୁହାଯାଉଛି ଯେ ମୁମ୍ବାଇରେ ସିରିଏଲ ବିସ୍ଫୋରଣ ଏବଂ ଦଙ୍ଗା ପରେ ପଳାୟନ କରିଥିବା ଦାଉଦ ଇବ୍ରାହିମର ମୁମ୍ବାଇରେ ଥିବା ବେଆଇନ ବ୍ୟବସାୟର ଦାୟିତ୍ୱ ହସିନା ପାର୍କର ବୁଝୁଥିଲା । ଅପରାଧ ଜଗତରେ ତାଙ୍କୁ ନାଗପଡ଼ାର ଗଡମଦର ଓ ଓ ଆପ୍ପା (ବଡ଼ ଭଉଣୀ) ବୋଲି କୁହାଯାଉଥିଲା । ତେବେ ୨୦୧୪ରେ ହୃଦଘାତରେ ତାଙ୍କର ମୃତ୍ୟୁ ହୋଇଥିଲା।
ନିତା ନାୟକ
ନୀତା ନାୟକ ଗ୍ୟାଙ୍ଗଷ୍ଟର ଅଶ୍ୱିନ ନାୟକଙ୍କ ପତ୍ନୀ ଭାବେ ପରିଚିତ, ସେ ତାଙ୍କ ସ୍ୱାମୀଙ୍କ ଉତ୍ତରାଧିକାରୀ ମଧ୍ୟ ହୋଇଥିଲେ। ଅଶ୍ୱିନ ସାରା ଦେଶରେ ଏକ ଡଜନରୁ ଅଧିକ ଦାଦାବଟି, ଡ୍ରଗ୍ସ କାରବାର ଏବଂ ହତ୍ୟା ମାମଲାରେ ଜେଲରେ ଥିବାବେଳେ ଗ୍ୟାଙ୍ଗକୁ ନିତା ଚଳାଉଥିଲା । ମୁମ୍ବାଇରେ ଅରୁଣ ଗୱଲି ଏବଂ ଅଶ୍ୱିନ ନାୟକଙ୍କ ମଧ୍ୟରେ ଗ୍ୟାଙ୍ଗୱାର ହୋଇଥିଲା । ଅରୁଣ ଗଓ୍ଵଲିଙ୍କ ଆକ୍ରମଣରେ ଅଶ୍ୱିନ ଆହତ ହୋଇଥିଲା । ତେବେ ପରବର୍ତ୍ତୀ ସମୟରେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା ଏବଂ ୨୦୦୦ ମସିହାରେ ଅଶ୍ୱିନ ନିତାଙ୍କୁ ତାଙ୍କ ସହଯୋଗୀଙ୍କ ସହ ହତ୍ୟା କରିଥିଲେ। ଏହାପରେ ୨୦୦୫ରେ ଅଶ୍ୱିନଙ୍କ ସହଯୋଗୀ ମଧ୍ୟ ପୁଲିସ ଏନକାଉଣ୍ଟରରେ ନିହତ ହୋଇଥିଲେ।
କେଡି କେମ୍ପେମ୍ମା: ସାଇନାଇଡ କିଲର
ବେଙ୍ଗାଲୁରୁର ସିରିଏଲ କିଲର କେଡି କେମ୍ପାମ୍ମା ମଧ୍ୟ ସାରା ଦେଶରେ ସାଇନାଇଡ କିଲର ନାମରେ ପରିଚିତ ଥିଲେ । କର୍ଣ୍ଣାଟକର କେଡି କେମ୍ପାମ୍ମା ସାଇନାଇଡ ମଲିକା ନାମରେ ମଧ୍ୟ ପରିଚିତ ଥିଲେ । ସେ ବାଙ୍ଗାଲୋରର ଏକ ମନ୍ଦିରରେ ରହୁଥିଲେ ଏବଂ ଏହାକୁ ନିଜ ପାପର ଆଶ୍ରୟସ୍ଥଳୀ ରେ ପରିଣତ କରିଥିଲେ । ସେ ମନ୍ଦିରକୁ ଆସୁଥିବା ଧନୀ ମହିଳାଙ୍କୁ ଟାର୍ଗେଟ କରୁଥିଲେ। ପରିବାର ଓ ପିଲାଙ୍କ ସମସ୍ୟାରେ ପୀଡ଼ିତ ମହିଳାଙ୍କ ସମସ୍ତ ଦୁଃଖ ଓ ଯନ୍ତ୍ରଣା ଦୂର କରିବା ପାଇଁ ସେ ପ୍ରତିଶ୍ରୁତି ଦେଉଥିଲେ। ସେ ସେମାନଙ୍କୁ ସ୍ୱତନ୍ତ୍ର ପୂଜା ପାଇଁ ସମସ୍ତ ଗହଣା ପିନ୍ଧିବାକୁ କହୁଥିଲେ ଏବଂ ତା’ପରେ ବାହାନାରେ ବିଷ ପିଇ ସେମାନଙ୍କ ସମ୍ପତ୍ତି ଲୁଟୁଥିଲେ । ଲୁଟର ଶିକାରଙ୍କୁ ମଧ୍ୟ ସେ ହତ୍ୟା କରୁଥିଲା ।
ଧରାପଡ଼ିବା ପରେ ତାକୁ ଏହି ଜଘନ୍ୟ ଅପରାଧ ପାଇଁ ଫାଶୀ ଦଣ୍ଡାଦେଶ ଦିଆଯାଇଥିଲା। କିନ୍ତୁ ପରେ ଫାଶୀ ଦଣ୍ଡାଦେଶକୁ ଆଜୀବନ କାରାଦଣ୍ଡରେ ପରିଣତ କରାଯାଇଥିଲା। ୧୯୭୦ମସିହାରେ ଜନ୍ମଗ୍ରହଣ କରିଥିବା କେଡି କେମ୍ପାମ୍ମା ୧୯୯୯ରେ ପ୍ରଥମ ହତ୍ୟା କରିଥିଲା । ଏହାପରେ ପରବର୍ତ୍ତୀ ୮ ବର୍ଷ ମଧ୍ୟରେ ସେ ୬ଟି ହତ୍ୟା କାଣ୍ଡ ଘଟାଇଥିଲେ। ୨୦୦୭ ଅକ୍ଟୋବରରୁ ଡିସେମ୍ବର ମଧ୍ୟରେ ୫ଟି ହତ୍ୟାକାଣ୍ଡ ଘଟିଥିଲା।
ସୋନୁ ପଞ୍ଜାବନ
ହରିୟାଣାର ରୋହତକର ବାସିନ୍ଦା ଗୀତା ଅରୋରା ଓରଫ ସୋନୁ ପଂଜାବନ ଦେଶର ହାଇପ୍ରୋଫାଇଲ ସେକ୍ସ ରାକେଟ ଚଳାଇବାରେ ଅଭ୍ୟସ୍ତ, କିନ୍ତୁଅପରାଧ ଦୁନିଆରେ ତାର ଆତଙ୍କ କିଛି କମ୍ ନଥିଲା । ୨୦୧୭ ଡିସେମ୍ବରମାସରେ ଜଣେ ୧୩ ବର୍ଷୀୟ ନାବାଳିକାଙ୍କ ଦେହ ବ୍ୟବସାୟ ଅଭିଯୋଗରେ ସୋନୁଙ୍କୁ ପୁଲିସ ଗିରଫ କରିଥିଲା। ସୋନୁଙ୍କର ଦୁଇଟି ବିବାହ ହୋଇଥିଲା ଏବଂ ଦୁର୍ଭାଗ୍ୟବଶତଃ ଉଭୟ ସ୍ୱାମୀ ପୋଲିସ ଏନକାଉଣ୍ଟରରେ ପ୍ରାଣ ହରାଇଥିଲେ । ୨୦୧୪ରେ ଏନକାଉଣ୍ଟରରେ ନିହତ ହୋଇଥିବା ଗ୍ୟାଙ୍ଗଷ୍ଟର ବିଜୟ ସିଂହଙ୍କୁ ସେ ପ୍ରଥମେ ବିବାହ କରିଥିଲେ। ସେ ଗ୍ୟାଙ୍ଗଷ୍ଟର ହେମନ୍ତ ସିଂହଙ୍କୁ ବିବାହ କରିଥିଲେ ଏବଂ ଦୁଇ ବର୍ଷ ପରେ ଗୁରୁଗ୍ରାମରେ ତାଙ୍କୁ ହତ୍ୟା କରାଯାଇଥିଲା। ସୋନୁଙ୍କ ନାଁରେ ଶିଶୁ ଯୌନ ଅପରାଧ ସୁରକ୍ଷା ଆଇନ (ପୋକ୍ସୋ) ଏବଂ ୫ଟି ହତ୍ୟା ମାମଲା ରହିଛି।
ରୁବିନା ସିରାଜ ସୟଦ
ଅପରାଧ ଦୁନିଆରେ ହିରୋଇନ ଭାବେ ପ୍ରସିଦ୍ଧ ଥିବା ରୁବିନା ଏକଦା ଜଣେ ସୁନ୍ଦରୀ ଥିଲେ। ଶୀଘ୍ର ଧନୀ ହେବା ର ଲୋଭରେ ରୁବିନା ଗ୍ୟାଙ୍ଗଷ୍ଟର ଛୋଟା ରାଜନ ସହ ହାତ ମିଳାଇଥିଲେ । ସେ ନିଜ ସୌନ୍ଦର୍ଯ୍ୟ ବଳରେ ପୋଲିସ ଅଧିକାରୀଙ୍କ ସମେତ ଅନେକ ଲୋକଙ୍କୁ ନିୟନ୍ତ୍ରଣ କରୁଥିଲେ ଏବଂ ସୌନ୍ଦର୍ଯ୍ୟର ଫାଇଦା ଉଠାଇ ୭୦ ଦଶକରେ ଜେଲରେ ଥିବା ଛୋଟା ସକିଲଙ୍କ ସହଯୋଗୀମାନଙ୍କୁ ଅସ୍ତ୍ରଶସ୍ତ୍ର ଏବଂ ଡ୍ରଗ୍ସ ପହଞ୍ଚାଇବା ଆରମ୍ଭ କରିଥିଲେ । ଆତଙ୍କ ଏତେ ଥିଲା ଯେ ମହାରାଷ୍ଟ୍ର ସରକାରଙ୍କୁ ଏହା ଉପରେ ମକୋକା ଲଗାଇବାକୁ ପଡ଼ିଥିଲା।
ଜେନାବାଇ ଦାରୁୱାଲା
ମୁମ୍ବାଇର ଜେନାବାଇ ଦାରୁୱାଲା ଏକଦା ରାସନର କଳାବଜାରୀରେ ସମ୍ପୃକ୍ତ ଥିଲେ। ଏହାପରେ ସେ ମଦ ବ୍ୟବସାୟରେ ପାଦ ରଖିଥିଲେ। ମୁମ୍ବାଇର ନାଗପଡ଼ାରେ ତାଙ୍କର ଏକ ଘର ଥିଲା, ଯେଉଁଠାକୁ ବଡ଼ ବଡ଼ ଲୋକ ଆସୁଥିଲେ ଓ ଯାଉଥିଲେ। କୁହାଯାଉଛି ଯେ ଜେନାବାଈଙ୍କର ନିଜର କୌଣସି ଗ୍ୟାଙ୍ଗ ନଥିଲା, କିନ୍ତୁ ଅଣ୍ଡରୱାର୍ଲ୍ଡର ସମସ୍ତ ବଡ ଗ୍ୟାଙ୍ଗଷ୍ଟର ଯଥା କରିମ ଲାଲା, ହାଜି ମସ୍ତାନ ଏବଂ କ୍ରାଇମବ୍ରାଞ୍ଚ ଅଧିକାରୀ ତାଙ୍କ ଘରକୁ ଆସୁଥିଲେ । ହାଜି ମସ୍ତାନ ତାଙ୍କୁ ଆପା ବୋଲି ଡାକୁଥିଲେ। ଏମାନଙ୍କ ମଧ୍ୟରୁ ସମସ୍ତେ ତାଙ୍କୁ ସମ୍ମାନ ଦେଉଥିଲେ । କୁହାଯାଏ ଯେ ଜେନାବାଇ ମକ୍କାରେ ୨୨ ଜଣ ଡନ୍ ଙ୍କୁ ଏକାଠି କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ସମୀରା ଜୁମାନି
୧୯୯୩ ମୁମ୍ବାଇ ବୋମା ବିସ୍ଫୋରଣ ମାମଲାରେ ଦୋଷୀ ସାବ୍ୟସ୍ତ ହୋଇଥିବା ଗ୍ୟାଙ୍ଗଷ୍ଟର ଅବୁ ସାଲେମଙ୍କ ପତ୍ନୀ ସମୀରା ଜୁମାନି ନିଜ ସ୍ୱାମୀଠାରୁ କିଛି କମ୍ ନଥିଲା । । ବୋମା ବିସ୍ଫୋରଣ, ଠକେଇ ଓ ଦାଦାବଟି ଭଳି ସାଂଘାତିକ ଅପରାଧରେ ସମୀରା ଜୁମାନିର ନାଁ ମଧ୍ୟ ରହିଛି। ଆଜୀବନ କାରାଦଣ୍ଡ ଭୋଗିବା ପାଇଁ ଅବୁଙ୍କୁ ମୁମ୍ବାଇର ଆର୍ଥର ରୋଡ୍ ଜେଲ୍ କୁ ପଠାଇ ଦିଆଯାଇଥିଲେ ମଧ୍ୟ ପୁଲିସ ସମୀରାଙ୍କୁ ପାଇନଥିଲା। କୁହାଯାଉଛି ଯେ ସେ ମଧ୍ୟ ଆବୁଙ୍କ ଭଳି ବିଦେଶରେ ଲୁଚି ରହିଛି।
