ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଆଲୋଚନାରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରତିରକ୍ଷା, ବାଣିଜ୍ୟ, ନିବେଶ, ଶକ୍ତି ସୁରକ୍ଷା ଏବଂ ପ୍ରଯୁକ୍ତିବିଦ୍ୟା ସମେତ ଅନେକ ବିଷୟ ଉପରେ ଆଲୋଚନା କରିଥିଲେ। ସେ କହିଥିଲେ, ଆମେରିକା ଭାରତକୁ ତେଲ ଏବଂ ଗ୍ୟାସ ବିକ୍ରି କରିବ। ବିଶ୍ୱର ସବୁଠାରୁ ଉନ୍ନତ F-35 ଲଢ଼ୁଆ ବିମାନ ମଧ୍ୟ ଯୋଗାଇବ। ଟ୍ରମ୍ପଙ୍କ ଏଭଳି ମନ୍ତବ୍ୟରୁ ଲାଗୁଥିଲା ଯେ,ସେ ପ୍ରଧାନମନ୍ତ୍ରୀ ମୋଦୀଙ୍କୁ ତାଙ୍କ ସାମଗ୍ରୀ କିଣିବା ପାଇଁ ଚାପ ପକାଉଛନ୍ତି । କିନ୍ତୁ ଯେତେବେଳେ ମିଳିତ ବକ୍ତବ୍ୟ ଆସିଲା ସେଥିରେ ଡୋନାଲ୍ଡ ଟ୍ରମ୍ପ ଉଲ୍ଲେଖ କରିଥିବା ଅନେକ ଜିନିଷ ନଥିଲା। ଏଥିରୁ ସ୍ପଷ୍ଟ ଯେ ଭାରତ ସେହି ପ୍ରସଙ୍ଗଗୁଡ଼ିକୁ ଅଧିକ ଗୁରୁତ୍ୱ ଦେଇ ନଥିଲା।
ପ୍ରଧାନମନ୍ତ୍ରୀ ମୋଦିଙ୍କ ସହ ଏକ ମିଳିତ ସାମ୍ବାଦିକ ସମ୍ମିଳନୀରେ ଡୋନାଲ୍ଡ ଟ୍ରମ୍ପ କହିଛନ୍ତି ଯେ ଭାରତ ଆମେରିକାଠାରୁ ଅତ୍ୟାଧୁନିକ F-35 ଲଢ଼ୁଆ ବିମାନ କିଣିବ। କିନ୍ତୁ ମିଳିତ ଘୋଷଣାପତ୍ରରେ ଏହା ନଥିଲା । ଏହାସହ ବୈଦେଶିକ ସଚିବ ବିକ୍ରମ ମିଶ୍ରି ସ୍ପଷ୍ଟ ଭାବରେ କହିଛନ୍ତି ଯେ ଏହା କେବଳ ଏକ ପ୍ରସ୍ତାବ ଏବଂ ଏ ସମ୍ପର୍କରେ କୌଣସି ପ୍ରକ୍ରିୟା ଆରମ୍ଭ ହୋଇନାହିଁ। ଏହାର ଅର୍ଥ ସ୍ପଷ୍ଟ ଯେ ଭାରତ ଏବେ ଏ ସମ୍ପର୍କରେ କୌଣସି ନିଷ୍ପତ୍ତି ନେବାକୁ ଚାହୁଁ ନାହିଁ। ଅନ୍ୟପକ୍ଷରେ ଜାଭେଲିନ୍ ଆଣ୍ଟି-ଗାଇଡେଡ୍ ମିସାଇଲର ମିଳିତ ଉତ୍ପାଦନ ପାଇଁ ଏକ ଚୁକ୍ତିନାମା ହୋଇଥିଲା। ଅର୍ଥାତ ଭାରତ ଆମେରିକା ସହ ମିଶି ଏହି କ୍ଷେପଣାସ୍ତ୍ରଗୁଡ଼ିକ ତିଆରି କରିବ।
ଶୁଳ୍କ
ଯଦିଓ ଟ୍ରମ୍ପ କହିଥିବେ ଯେ ଆମେରିକା ଭାରତୀୟ ଉତ୍ପାଦ ଉପରେ ଭାରତ ପରି ସମାନ ଶୁଳ୍କ ଲଗାଇବ। କିନ୍ତୁ ଜଏଣ୍ଟ ଷ୍ଟେଟମେଣ୍ଟରେ ଏନେଇ କୌଣସି ସ୍ପଷ୍ଟ ଉଲ୍ଲେଖ ନାହିଁ। କେବଳ ଏତିକି ନୁହେଁ ଭାରତ ଶୁଳ୍କ ହ୍ରାସ କରିବା ନେଇ ମଧ୍ୟ ପ୍ରଶଂସିତ ହୋଇଛି। ଦ୍ୱିତୀୟତଃ ଭାରତ ଅନେକ ଆମେରିକୀୟ ଉତ୍ପାଦ ଯେପରିକି ଆଲଫାଲଫା ଘାସ, ବତକ ମାଂସ ଏବଂ କିଛି କୃଷି ଉତ୍ପାଦ ପାଇଁ ବଜାର ଖୋଲିଛି, ଯାହା ଭାରତରେ ଅଧିକ ବ୍ୟବହୃତ ହୁଏ ନାହିଁ। ଅନ୍ୟପଟେ ଭାରତ ପ୍ରତିବଦଳରେ ଡାଳିମ୍ବ ଏବଂ ଆମ୍ବ ରପ୍ତାନି ପାଇଁ ରାସ୍ତା ଖୋଲି ଦେଇଛି। ଗ୍ରୀନ ଏନର୍ଜି ସହଯୋଗ ବିଷୟରେ ଆଲୋଚନା ହୋଇଛି, ଏହା ପୂର୍ବରୁ ଭାରତର ଇଚ୍ଛା ଥିଲା କାରଣ ଏହା ନିବେଶ ଆଣିବ।
ତେଲ ଏବଂ ଗ୍ୟାସ
ସେହିପରି ଟ୍ରମ୍ପ କହିଥିଲେ ଯେ ଭାରତ ଆମେରିକାରୁ ବିପୁଳ ପରିମାଣରେ ତେଲ ଏବଂ ଗ୍ୟାସ କିଣିବାକୁ ଯାଉଛି। କିନ୍ତୁ ଏହା ମଧ୍ୟ କୁହାଯାଉଛି ଯେ ‘ଉଭୟ ନେତା ତେଲ, ଗ୍ୟାସ ଏବଂ ପରମାଣୁ ଶକ୍ତି ସମେତ ଆମେରିକା-ଭାରତ ଶକ୍ତି ସୁରକ୍ଷା ସହଭାଗୀତା ପ୍ରତି ପୁନର୍ବାର ପ୍ରତିବଦ୍ଧତା ପ୍ରକାଶ କରିଛନ୍ତି।’ ଏହି ବିବୃତ୍ତିରୁ ସ୍ପଷ୍ଟ ଯେ ଏଥିରେ କିଛି ନୂତନତ୍ବ ନାହିଁ। ଏନେଇ ପୂର୍ବରୁ ଆଲୋଚନା ଚାଲିଛି। ତେବେ ବୈଦେଶିକ ସଚିବ ବିକ୍ରମ ମିଶ୍ରୀ ନିଶ୍ଚିତ ଭାବରେ କହିଛନ୍ତି ଯେ ଏହା ବାଣିଜ୍ୟ ନିଅଣ୍ଟ ହ୍ରାସ କରିବାର ଏକ ଉପାୟ ହୋଇପାରେ।
