ବରିଷ୍ଠ ଅଭିନେତା ମନୋଜ କୁମାରଙ୍କ ନିଧନ ହୋଇଯାଇଛି। ସେ ନିଜର ଚଳଚ୍ଚିତ୍ର ଓ ଅଭିନୟ ମାଧ୍ୟମରେ ଦର୍ଶକଙ୍କ ହୃଦୟ ଜିତିଥିଲେ। ମନୋଜ କୁମାର ଏପରି ଜଣେ ଅଭିନେତା ଥିଲେ, ଯିଏ ନିଜ ଚଳଚ୍ଚିତ୍ର ମାଧ୍ୟମରେ ଦେଶଭକ୍ତି ଓ ସାମାଜିକ ସନ୍ଦେଶ ପ୍ରଦାନ କରିଥିଲେ। ତାଙ୍କ ନିଧନ ସହିତ ହିନ୍ଦୀ ସିନେମା ଜଗତ ଜଣଏ ବରିଷ୍ଠ କଳାକାରଙ୍କୁ ହରାଇଛି , କିନ୍ତୁ ତାଙ୍କ ଚଳଚ୍ଚିତ୍ରଗୁଡ଼ିକର ଛାପ ସବୁବେଳେ ଲୋକଙ୍କ ହୃଦୟରେ ରହିବ। ବଲିଉଡରେ ମନୋଜ କୁମାରଙ୍କ ସାହସୀ ମନୋଭାବର ଅନେକ କାହାଣୀ ଶୁଣିବାକୁ ମିଳେ, କିନ୍ତୁ ଏପରି ଏକ କାହାଣୀ ଅଛି ଯାହା ଇନ୍ଦିରା ଗାନ୍ଧୀଙ୍କ ସହ ଜଡ଼ିତ। ଏହି କାହାଣୀ ସେହି ସମୟର ଯେତେବେଳେ ମନୋଜ କୁମାର ଇନ୍ଦିରା ଗାନ୍ଧୀଙ୍କ ଜରୁରୀକାଳୀନ ସ୍ଥିତି (ଇମରଜେନ୍ସି)ର ଜୋରଦାର ବିରୋଧ କରିଥିଲେ।
ଇମରଜେନ୍ସି ସମୟରେ ମନୋଜ କୁମାରଙ୍କ ଚଳଚ୍ଚିତ୍ର ଉପରେ ପ୍ରତିବନ୍ଧକ
ପ୍ରାରମ୍ଭିକ ସମୟରେ ଇନ୍ଦିରା ଗାନ୍ଧୀ ଓ ମନୋଜ କୁମାରଙ୍କ ମଧ୍ୟରେ ସବୁକିଛି ଠିକ୍ ଥିଲା। କିନ୍ତୁ ଯେତେବେଳେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଇମରଜେନ୍ସି ଘୋଷଣା କଲେ, ସବୁକିଛି ଦେଖୁଦେଖୁ ବଦଳିଯାଇଥିଲା। ସେହି ସମୟରେ ଯେଉଁ ଚଳଚ୍ଚିତ୍ର କଳାକାରମାନେ ଇମରଜେନ୍ସିର ବିରୋଧ କରୁଥିଲେ, ସେମାନଙ୍କ ଫିଲ୍ମ ଉପରେ ପ୍ରତିବନ୍ଧକ ଲଗାଯାଉଥିଲା। ଏହି ତାରକାଙ୍କ ଚଳଚ୍ଚିତ୍ରଗୁଡ଼ିକ ମୁକ୍ତିଲାଭ ହେବା ସଙ୍ଗେ ସଙ୍ଗେ ପ୍ରତିବନ୍ଧିତ କରାଯାଉଥିଲା। କିନ୍ତୁ ମନୋଜ କୁମାର ଏପରି ସାହସୀ ଅଭିନେତା ଥିଲେ, ଯିଏ ଇମରଜେନ୍ସିର ଖୋଲାଖୋଲି ବିରୋଧ କରିଥିଲେ। ଫଳସ୍ୱରୂପ, ତାଙ୍କ ଚଳଚ୍ଚିତ୍ରଗୁଡ଼ିକ ଉପରେ ମଧ୍ୟ ପ୍ରତିବନ୍ଧକ ଲାଗିବା ଆରମ୍ଭ ହୋଇଗଲା। ମନୋଜ କୁମାରଙ୍କ ଚଳଚ୍ଚିତ୍ର ‘ଦସ ନମ୍ବରୀ’ ମୁକ୍ତିଲାଭ କରିବା ପରେ ସୂଚନା ପ୍ରସାରଣ ମନ୍ତ୍ରଣାଳୟ ଏହାକୁ ପ୍ରତିବନ୍ଧିତ କରିଦେଇଥିଲା। ଏହାପରେ ‘ଶୋର’ ମୁକ୍ତିଲାଭ କରିବା ସମୟରେ ମଧ୍ୟ ସମାନ ପରିସ୍ଥିତି ଦେଖାଦେଇଥିଲା।
ସରକାରଙ୍କ ବିରୁଦ୍ଧରେ ମାମଲା ଜିତିଥିବା ଏକମାତ୍ର ଅଭିନେତା
‘ଶୋର’ର ନିର୍ଦ୍ଦେଶକ ଓ ପ୍ରଯୋଜକ ଉଭୟ ମନୋଜ କୁମାର ଥିଲେ। ଏହିପରି ଥିଏଟରରେ ପ୍ରତିବନ୍ଧକ ଲାଗିବା ପରେ ସେହି ସମୟରେ ଚଳଚ୍ଚିତ୍ରଟିକୁ ତୁରନ୍ତ ଦୂରଦର୍ଶନରେ ମୁକ୍ତିଲାଭ କରାଯାଇଥିଲା। ଏହା ଯୋଗୁଁ ଆୟ ମୋଟେ ହୋଇନଥିଲା ଏବଂ ମୁକ୍ତିଲାଭ ପରେ ତାଙ୍କୁ ବଡ଼ ଧରଣର କ୍ଷତି ସହିବାକୁ ପଡ଼ିଥିଲା। ଏବେ ମନୋଜ କୁମାରଙ୍କ ପାଖରେ କୋର୍ଟକୁ ଯିବା ବ୍ୟତୀତ ଅନ୍ୟ କୌଣସି ଉପାୟ ବାକି ନଥିଲା। ସେ କୋର୍ଟର ଦ୍ୱାରସ୍ଥ ହେଲେ ଏବଂ ଅନେକ ସପ୍ତାହ ଧରି କଚେରୀର ଚକ୍କର କାଟିଲେ। ତେବେ, ମନୋଜ କୁମାରଙ୍କୁ ଏହାର ଲାଭ ମିଳିଥିଲା ଏବଂ ନିଷ୍ପତ୍ତି ତାଙ୍କ ପକ୍ଷରେ ଆସିଥିଲା। ତେଣୁ ତାଙ୍କ ପାଇଁ ଏହା ମଧ୍ୟ କୁହାଯାଏ ଯେ ସେ ଦେଶର ଏକମାତ୍ର ଅଭିନେତା ଥିଲେ, ଯିଏ ସରକାରଙ୍କ ବିରୁଦ୍ଧରେ ମାମଲା ଜିତିଥିଲେ। ଯଦିଓ ପରେ ସରକାର ମନୋଜ କୁମାରଙ୍କୁ ଇମରଜେନ୍ସି ଉପରେ ଚଳଚ୍ଚିତ୍ର ନିର୍ମାଣ କରିବାକୁ କହିଥିଲେ, କିନ୍ତୁ ସେ ସେହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଦେଇଥିଲେ।
ଅମୃତା ପ୍ରୀତମଙ୍କୁ ଜୋରଦାର ତାଗିଦ୍
ଏତିକି ନୁହେଁ, ରିପୋର୍ଟ ଅନୁସାରେ ଯେତେବେଳେ ମନୋଜ କୁମାରଙ୍କ ପାଖକୁ ସୂଚନା ଓ ପ୍ରସାରଣ ବିଭାଗରୁ ଫୋନ୍ ଆସିଥିଲା ଯେ ସେ ଇମରଜେନ୍ସି ଉପରେ ନିର୍ମାଣ ହେଉଥିବା ଡକ୍ୟୁମେଣ୍ଟାରୀର ନିର୍ଦ୍ଦେଶନା କରିବେ କି, ସେ ସ୍ପଷ୍ଟ ଭାବେ ମନା କରିଦେଇଥିଲେ। ଯେତେବେଳେ ତାଙ୍କୁ ଖବର ମିଳିଲା ଯେ ଏହାର ଚିତ୍ରନାଟ୍ୟ ଅନ୍ୟ କେହି ନୁହେଁ ବରଂ ସେହି ସମୟର ପ୍ରସିଦ୍ଧ ଲେଖିକା ଅମୃତା ପ୍ରୀତମ ଲେଖୁଛନ୍ତି, ସେ ରାଗରେ ଅମୃତା ପ୍ରୀତମଙ୍କୁ ଫୋନ୍ କରିଥିଲେ। ସେ ସିଧାସିଧି ଅମୃତା ପ୍ରୀତମଙ୍କୁ ପଚାରିଥିଲେ, “ଆପଣ କ’ଣ ବିକ୍ରି ହୋଇଗଲେଣି?” ମନୋଜ କୁମାରଙ୍କ ମୁହଁରୁ ଏପରି କଥା ଶୁଣି ଅମୃତା ମଧ୍ୟ ଦୁଃଖୀ ହୋଇପଡ଼ିଥିଲେ ଏବଂ କୁହାଯାଏ ଯେ ମନୋଜ କୁମାର ତାଙ୍କୁ ଏହା ମଧ୍ୟ କହିଥିଲେ ଯେ ସେମାନଙ୍କୁ ଏହି ଡକ୍ୟୁମେଣ୍ଟାରୀର ଚିତ୍ରନାଟ୍ୟ ଚିରି ଫିଙ୍ଗି ଦେବା ଉଚିତ।
